圖：80後靚女巴士車長笑容甜美/網上圖片

　　城巴最近有位80後靚女巴士車長上班，引嚟男士們蜂擁而至，有「粉絲」甚至網上直播靚女車長揸車過程，小妮子見有人影相，開車前都會禮貌地報以甜美笑容。鄭晴打聽到，靚女車長名叫阿穎，負責駕駛789號線往返小西灣至中環，尋日第六天上班咋。

　　事緣早幾日，有網民拍下阿穎放上互聯網，原先只係喺巴士迷群組之間流傳，消息一傳十，十傳百，至尋日，更引來大批市民（男士為主）追訪，有「粉絲」甚至透過facebook即時直播阿穎揸車過程。

　　上班六日 有姿勢有實際

　　原來，阿穎尋日先至第六日返工，之前從事飲食業，想轉換工作環境，所以考到車牌三年後，再考巴士牌，應徵城巴做車長，最後成功獲聘。只見佢化咗個淡妝，雙手塗咗藍色指甲油，配襯一身藍色車長制服，加埋甜美笑容，難怪男士們暈得一陣陣。雖然佢係女仔，但駕駛技術相當好，沿途十分平穩，唔會急停，乘客都讚好。

　　城巴新巴發言人話，基於私隱，唔方便透露車長嘅個人資料，公司現時共有3700多名全職車長，女車長佔約2%，即約74人。

　　面對市民瘋狂追訪，城巴新巴發言人作出溫馨提示，為確保行車安全，乘客請勿於行車期間與車長談話或妨礙車長駕駛。

　　鄭晴