由發展局局長升任為財政司司長嘅陳茂波，聽日將會「更上一層樓」。特首辦話，行政長官梁振英將於今個禮拜四訪問深圳同廣州，同日夜晚就會返港。特首離港期間，政務司司長張建宗將會喺當日上晝署任行政長官職務；陳茂波就響當日下午至晚上署任行政長官。點解政府要安排兩位司長各自署任特首半日咁特別呢？
原來，陪同特首出訪嘅官員，除政制及內地事務局局長譚志源同行政長官辦公室主任邱騰華外，張建宗同食物及衛生局局長高永文將分別參與廣州同深圳嘅行程。按規定，特首職務會依次由政務司司長、財政司司長同律政司司長署任，咁當特首同張建宗離港，自然就由陳茂波署任特首。
