立法會議員梁國雄。大公報記者黃洋港/攝

　　大公網11月18日訊 公民黨立法會議員譚文豪早前響大會發言嗰陣，誤將「馬首是瞻」讀錯做「馬首是『膽』」，旋即成為網民恥笑對象，雖然譚議員事後急急整咗條片自嘲，諗住挽回▉些少／些小（一點兒）▉面子，但睇嚟社民連梁國雄（長毛）冇留意到喇，仲搞到譚議員俾建制派同事笑多次添。

　　話說今日立法會內務委員會開會，就調查特首梁振英UGL事件嘅專責委員會成立籌備小組委員會。由於有13位議員有意加入籌委會，多過上星期內會提出嘅11人，建制派就要求投票選出成員。有份報名嘅長毛就借題發揮，話建制派唔想佢入到籌委會，仲想將自己上次出席房屋同發展事務委員會聯席會議上，搶走發展局副局長馬紹祥嘅文件夾一事嚟講添，不過就唔記得馬副局叫咩名。

　　呢個時候，民建聯何俊賢即刻「溫馨提示」長毛，大叫：「馬首是『膽』啊！」其實係藉機想笑嚇譚文豪，點知長毛唔明個「笑點」，仲笑何俊賢讀錯字：「讀嚇書得唔得啊！」之後成班建制派議員就指住譚文豪嚟笑。

　　到投票表決嗰陣，「躺着也中槍」嘅譚文豪就行埋去長毛身邊「咬耳仔」，似乎係向佢講返個「典故」。長毛就尷尷尬尬咁話：「我唔睇網（網上資訊）架。」長毛，下次笑人之前記得做嚇功課喇。