圖：梁、游當選「議員」兩個月就成為梁游「已完」\大公報記者麥潤田攝

　　青年新政一直被「本土派」恥笑從未搞過正式嘅遊行或者其他所謂嘅抗爭活動，又或者未開始已取消。早幾日梁頌恆、游蕙禎終於現身佔領德輔道西嘅現場啦。表面上佢兩個好似好威，又呼籲示威者最緊要安全，又話可以「野貓式」自由發揮呀，不過梁頌恆就被電視台影到佢點樣退縮啦！

　　鄭晴就食住花生咁同廣大網民一起睇到，速龍小隊清場嗰陣，梁頌恆以「迅雷不及掩耳」嘅速度暴走，跑得仲快過保特啊！之後鏡頭一轉，就見到梁頌恆截咗部的士，但傳媒影住，佢又唔敢上車，但之後鏡頭一轉，梁頌恆都係快手快腳上的士速閃。唔講仲以為佢係《97家有囍事》嘅周星馳！

　　呢個咁樣「保護」示威者嘅做法，梗係受到各方人士恥笑啦！網民AlEx Wu就話：「私家的士嚟？你哋頂住呀，我走先。」另一位網民Claire Cheung就話：「有錢搭的士喎！唔知有冇WiFi、識唔識路呢？」網民Anthony Chan揶揄：「小學雞，自然地只懂亂叫、偷食同雞咁腳走！常識吧！」

　　民意就好清晰喇，但梁頌恆依然死撐，話「我好想問一句這就是傳媒第四權的道德和操守嘛？」嘩，自己走佬被人影到就賴傳媒，梁頌恆都算極級無賴。