大公網10月16日訊 青年新政梁頌恆日前喺立法會以英文宣誓時，將China讀成侮華字眼「支那」，事後佢居然相當無恥咁話係「鴨脷洲家鄉口音」，簡直係侮辱香港人嘅智商。唔知鴨脷洲嘅街坊點諗呢？海怡西區議員、新民黨陳家珮（Judy）日前親身喺鴨脷洲海怡半島訪問當區居民。喺海怡住咗十二年嘅朱太話，自己無聽過，但每個居住喺鴨脷洲，特別係海怡半島嘅人，每一個都係心繫海怡。而住咗海怡二十多年嘅佘太就話，唔知點解會有咁嘅口音。
Judy又邀請咗十幾個街坊讀出中國嘅英文全名，結果無一個人讀錯。Judy就話絕大部分街坊都未聽過咩叫「鴨脷洲家鄉口音」，而佢哋喺海怡辦事處有一啲英語補習班，如果梁頌恆有需要，都可以參加Judy辦事處嘅補習班喎。不過呢，梁頌恆不單止要惡補英文，更加要學下點樣做人，學返咩叫倫理道德！
