反對派尋日喺立法會宣誓儀式上大肆搗亂，如果唔計講粗口被人裁定無效嗰啲，人稱小麗「老師」（應該係，除非唔係）嘅九龍西立法會議員劉小麗，簡直係眾議員中嘅極品，100個字嘅誓詞可以用「龜速」讀足12分鐘，即係約720秒。畀人覺得，學習最怕老師拖鐘誤人子弟，劉「老師」咁嘅姿態，好似訓練有素咁，總唔會係想申請健力士世界紀錄啩。
嗱反對派騎呢招博出位就預咗，不過小麗「老師」呢種「拉布式」宣誓就真係令人幾躁底嘅。話說佢尋日用廣東話宣讀誓詞時，就先讀出啲同誓言無關嘅自創句子，話「本人劉小麗謹此承諾，由街頭進入議會，並必秉承雨傘運動……對抗極權」雲雲，立法會秘書長陳維安隨即打斷佢，叫佢重新宣誓。
哇，小麗咁「清高」又豈容人哋反對啊，佢隨即以傲慢態度回答「無啊」，但又重新以「龜速」宣讀誓詞，引起在席議員強烈不滿，仲有人要求佢立即「停止愚昧行為」。
其實最難為嘅，好可能係一班手語傳譯員，譯一個字又停一停，仲要將手勢「定格」，認真辛苦曬。
至於社福界邵家臻仲騎呢，喺讀出誓詞後敲打六下鈴鼓，又高呼「兩運動敗而不潰，繼續頑強，we are back」吸引注意，其實立法會宣誓啫，做馬騮戲咁，無嘢嘛。
