基仔滿足歌迷超時安哥(大會供圖)

　　大公網4月15日訊(記者 陳惠芳)古巨基WE世界巡迴演唱會香港站part 2，昨晚最後一場，基仔請來張智霖任嘉賓，一齊合唱「現代愛情故事」，唱到完場觀眾都不肯離開，不停大叫安哥，結果被罰錢都繼續唱下去，再次出來任歌迷點唱，最終唱到十二點才真正完結。 

　　身為嘉賓的Chilam穿上大紅花碌碌西裝上台，連基仔都驚訝，「嘩，你著到咁靚仔呀你！」 Chilam坦言自己一向都是黑白灰，但為了襯基仔，破例揀件花碌碌。Chilam又話，「我剛聽你講嘢，我先知原來你是我前輩喎，你比我早入行一年。我由細聽你歌大啦，前輩。」 

智霖花西裝襯基仔(大會供圖)

　　兩人合唱「現代愛情故事」之後，基仔話以前印象中Chilam是一個24小時都靚仔的人，最近這兩年同他愈玩愈多，成日見面，開始更了解佢，發覺他不止是一個靚仔咁簡單，重是一個開心果，經常帶給大家好多歡樂。基仔 : 「Chilam發現重是一個好錫老婆的人。我們有一些地方好相似 ，我記得有一次Chilam來我家玩，我工人姐姐拿了雪糕出來，他靜雞雞行去拿了雪糕之後，就突然聽到阿靚好惡大聲叫 : 「張智霖！你唔好食啦！」Chilam聞言笑住話，「係呀，你咪同我一樣，古巨基其實都係一個飢民！都是成日冇嘢食！」 

　　昨晚是尾場，歌迷聽完安哥，都不肯離場，不停大叫安哥再安哥，結果基仔再次出台，令觀眾開心到飛起。基仔手持手提電話出來，先是滿足歌迷需要，清唱《苦浪漫》及《幸福方舟》，繼而全場一齊大合唱《情歌王》作結。