圖：此二人不是「着埋同一條褲」，而是「着埋同一款褲」

　　「擸」，粵語方言用字，讀「laap3/臘6-3」；有取的意思；本字可能是「拿」。

　　示例1：

　　擸齊架生（所需工具），唔使開工嗰陣要嗰樣冇嗰樣！

　　示例2：

　　擸得幾多得幾多。（盡量掠取，含貶義）

　　對到處搜集的情況，廣東人會說：

　　擸埋／擸埋擸埋／擸擸埋埋

　　示例3：

　　嗰個八十幾歲嘅阿婆真係好可憐，由朝到晚喺街度執紙皮，「擸擸埋埋」都冇幾多。

　　當某人急步走時，廣東人會說：

　　三步擸埋兩步（走）

　　意思是三步併合兩步走。

　　示例4：

　　有日輝仔唔知醒，由起身到出門口得嗰半粒鐘，所以佢一出門口就心急如焚，「三步擸埋兩步」，卒之畀佢準時趕到返公司。

　　「着埋同一條褲」，其書面語是「穿一條褲子」。比喻情誼深厚、禍福與共、利害相同。

　　示例5（情誼深厚、禍福與共）：

　　我哋由細玩到大，就好似「着埋同一條褲」咁；如果有人想蝦你，我會同佢死過；如果我第日發咗達，梗會益你；不過咁喎，如果我老來唔掂，你就要睇住我收尾嗰兩年嚹嚇！

　　示例6（利害相同）：

　　我哋「着埋同一條褲」，你唔掂即係我唔掂，所以冇理由唔拍住上嘅！

　　在這個意義上，「着埋同一條褲」與「坐埋一條船」、「同舟共濟」、「一條線兒拴倆螞蚱（蝗蟲）」（跑不了你，也跑不了他）意近。

　　在粵語中，「着埋同一條褲」還有多兩個意義：其一指對某些事抱持相同態度；其二指二人有相同嗜好、取向、目標。

　　示例7（態度相同）：

　　佢兩公婆喺教仔嘅立場上，「着埋同一條褲」，唔會有個鬆有個緊。

　　示例8（取向相同）：

　　如有二人同時心儀同一個女子，有人會說他倆「着埋同一條褲」。

　　示例9（目標相同）：

　　在「打麻雀」中，當上下家做同一款牌時，人們會說他們「着埋同一條褲」。

　　講開又講，粵語片時代，有華南影帝之稱的吳楚帆在一次電台訪問中，憶述在1942年與後被公認為粵劇和電影編劇界的一代奇才唐滌生與其妻鄭孟霞參加「明星劇團」時，三人生活困厄，曾輪流「着埋同一條（較有體面的）褲」出席重要場合，可見他們關係非常密切。

　　資深出版人 梁振輝