美食車推出以來被指停泊位同人流不足，好多車要蝕本經營，美食車聯盟不時跟大型活動主辦人合作增加收入。美食車聯盟決定另開新門路自救，舉辦戶外婚禮到會。聯盟之一美食車「七桌子×樺得園」老闆林瑞華（Gordon）昨日「小登科」，搞咗個Wedding Crashing（陌生人婚禮），無收到囍帖嘅人都可以參與，向新人送上祝福。
Gordon話，上個月政府同意美食車可以以抽籤方式出席不同嘅活動，我哋美食車聯盟即刻諗咗個自救方法，就係響婚禮度搞到會。傳統婚宴來來去去都喺酒樓、酒店擺酒，覺得有啲悶，所以想玩突破，婚宴結合美食車，以美食車特色菜代替酒樓菜式。佢話美食車菜式都好意頭，例如七桌子嘅手撕豬肉漢堡，有「如珠如寶」的意思，「有得餃」既五色餃，有「食完有得找，唔會唔識搞」嘅意思。
美食車早前普遍話生意麻麻，國慶黃金周訪港內地旅客量大增，美食車生意都有受惠。「七桌子×樺得園」員工透露，近期泊喺香港迪士尼外，生意增一倍，每日生意額有兩萬蚊。「有得餃」近期泊喺觀塘起動九龍東一號場，生意一樣好好，整體升一倍。
