民建聯立法會議員柯創盛（柯仔，圓圖）同區議員陳俊傑位於坪石邨嘅聯合辦事處尋日開幕，唔少嘉賓蒞臨主禮，包括財政司司長陳茂波、中聯辦九龍工作部副部長盧寧、民政事務局副局長陳積志、民建聯主席李慧琼（Starry）等。服務社區25年嘅柯仔感謝社會各界人士同街坊支持之餘，仲回憶起從政之初嘅往事添。
柯仔話，25年前自己第一日返工，就被「老闆」、民建聯元老之一嘅陳鑑林叫咗去牛頭角下邨，逐家逐戶派單張，原來係想佢明白做地區工作必定要「以汗水灌溉社區」，唔能夠淨係留喺辦公室。柯仔亦都難忘同另一位民建聯元老譚耀宗喺90年代共事嘅情形，話每當有風災發生，都會同「譚Sir」一齊出動，去鯉魚門同茶果嶺視察。佢承諾會「不忘初心」，繼續將市民聲音帶入議會。
Starry話，坪石邨對於民建聯九龍東團隊有特別意義，唔少年輕成員都曾喺呢度「練得一身好武功」，包括商經局副局長陳百里及青年民建聯主席顏汶羽。
