圖：「放眼香港」圖片展，展出多張上世紀50年代香港面貌相片
今時今日嘅香港一片繁華，但如果無前人嘅努力建設，「東方之珠」又點能夠大放光芒呢？半個世紀前嘅舊香港，你對佢又有幾了解？香港大會堂展覽廳正舉辦嘅「放眼香港」圖片展，鄭晴尋日去咗參觀，覺得大開眼界，60幾幅首次展出嘅相，除咗紀錄50年代香港面貌，亦有反映二戰後平民百姓生活嘅情況。
展示港人艱苦奮鬥特質
50年代嘅香港，經歷二戰無耐，社會百廢待興，處於復甦階段。其中一幅相，就係今日有「香港千島湖」之稱、1957年落成嘅大欖涌水塘，正是香港開埠以來最大型嘅工程項目，水塘落成，香港水荒問題亦得以紓緩。
今時今日講起棚屋，大家好自然諗起大澳，但原來50年代嘅屯門青山灣，都有人以棚屋為居所，成為照片主題。而舊照片內嘅賣鹹魚小販、以船為家嘅水上人等，展示當年香港人艱苦奮鬥，為生活而努力嘅特質。
今次展出嘅圖片，由已故羅蘭士．嘉道理勳爵用Minox 8mm微型相機拍攝。事隔超過半世紀，呢一輯舊相成為部分香港歷史嘅載體。圖片展由羅蘭士．嘉道理兒子米高．嘉道理創立嘅「香港社會回顧發展項目」舉辦，展期至10月4日。
