道路使用者注意，香港旅遊發展局主辦嘅第三屆「香港單車節」，將於下月八日掀戰幔。因應活動安排，尖沙咀、九龍西及新界南多處，當日凌晨一點至傍晚六點，分階段實施封路，超過150條巴士線、小巴線受影響。
今屆單車節總共有九項賽事，除咗玩盡「三橋三跑」嘅50公里組賽事外，仲成為亞洲巡迴分站，首度舉辦UCI 1.1級賽事。旅發局話，今年活動參加者多達4900人，按年增7%，仲預計當日有六萬觀眾喺現場觀賞賽事。
運輸署預計，全港多處封路下，當日青嶼幹線往九龍方向、渡船街往尖沙咀方向、佐敦道以南、海港城附近嘅廣東道一帶，交通將會非常擠塞。呼籲駕駛人士，如非必要，應避免駕車前往受影響地區。至於旅客如需前往海運大廈、中國客運碼頭（中港城）或港鐵九龍站，記得提早出門喇。
