羅梁劉姚四人無議員做，就發動相關友好聯盟幫佢哋籌款，搞聯署聲明，造曬聲勢「扮到」好似深得民心，但又點瞞得過鄭晴法眼。話說有八個民間團體發起聯署聲明，話不滿劉小麗、姚松炎、梁國雄同羅冠聰被DQ。唔知情以為群情洶湧，鄭晴睇真啲，所謂嘅發起團體原來都係邵家臻為首嘅多個社工團體，大家藤瓜相連，好似發起聯署團體之一「社福同行」咪係邵家臻創辦「社工復興運動」嘅長期盟友，舊年特首選舉社福界別選委，兩個團體就拍住上搵票；另一個「關注學童發展權利聯席」組織幹事何汝瑛，既係「社福同行」成員，又係學聯統籌組織幹事，何汝瑛同邵家臻一樣參加違法「佔領」被捕，兩個都齊齊「踢保」。

　　而呢班聯署之首「關注綜援低收入聯盟」嘅外務副秘書長何俊昌、時事秘書鄭國龍就係社工學聯嘅人，邵家臻做過第十屆社工學聯外務副會長，到而家佢嘅影響力不減當年。咦！長毛無得做議員，喺7月17日、18日兩次以「關注綜援低收入聯盟」嘅代表身份，入立法會公聽會繼續搞搞震。

　　長毛同呢班社工組織咁熟，皆因有議員助理係註冊社工，舊年立法會新界西選舉，社民連副主席黃浩銘參選就大打社福牌，拉攏呢班活躍社運同基層嘅社工團體。當然邵家臻幫DQ四人搞聯署都係幫人兼幫已，事關佢下個月19號都要就煽惑公眾案到庭接受審訊，邵分分鐘有需要為自己搞聯署做定功夫囉。