圖：SPACE出書介紹校友持續進修學習之路\大公報記者唐曉明攝
終身學習，有益身心！今年係香港大學專業進修學院（SPACE）創立六十周年，學院為隆重其事，將出書介紹校友嘅持續進修學習之路。唔講唔知，SPACE除咗為廣大市民提供進修機會，原來亦係政界商界名人吸收養分嘅地方，例如現任港區全國人大代表及全國人大常委會委員范徐麗泰、執業律師翁靜晶、前香港賽馬會董事局主席陳祖澤、現任數碼港主席林家禮等，都曾經係SPACE嘅學生。
香港天文台前台長林超英都係SPACE學生，仲讀咗唔少課程，包括中小企管理學、西洋畫欣賞、觀鳥等，佢尋日同鄭晴分享，原來佢當天文台長時，曾經用咗三年時間去讀西班牙語，佢仲透露，專登揀啲自己覺得難度高嘅課程，可以畀佢全身投入，藉此「忘卻」天文台工作。
除此之外，被外間認為中英文水平高超嘅立法會前主席曾鈺成，原來都曾經去SPACE學數，後嚟更返SPACE做微積分課程導師。睇嚟SPACE創立六十周年來星光熠熠，我鄭晴都唔執輸，去佢哋官網睇下有無課程啱報讀先！
