民主黨成員林子健早前報稱喺油尖旺區被「內地強力部門」擄走、迷暈及毆打，點知事件峰迴路轉，佢最終被警方拘捕並被控誤導警務人員罪，禁止離港，所以林子健即使早前獲美國耶魯大學神學院取錄讀博士，都好難前往當地註冊入學。有報章尋日就踢爆，曾陪同林子健開記招交代被擄走事件嘅民主黨創黨主席李柱銘，原來有份資助林子健讀博士嘅學費同生活費，不過已潛水多日的李柱銘接受報章查詢時，就拒絕評論事件，繼續同林子健劃清界線。
李柱銘同林子健都是白鴿黨嘅創黨黨員，兩人關係一直匪淺，林子健舊年競逐民主黨副主席時，李更拍攝短片為其站台，因此李肯為林嘅學費埋單，一啲都唔奇怪。鄭晴就覺得，林子健而家搞成咁，李柱銘有不可推卸嘅責任，佢同何俊仁當日未搞清楚成件事，就力主召開記者會，但係林子健被捕後又不願挺身公開交代，同埋向市民道歉，做法認真欠缺擔當。
