工黨內訌，內幕愈揭愈精彩！日前爆出胡穗珊辭去主席兼退黨，原來同何秀蘭有關，因為胡穗珊曾經投訴何嘅言行，原本紀律委員會就裁定成立，之但係後來覆檢，就改話不作裁決。呢件事尋日又有新發展啦！工黨尋日再發表聲明，仲轉埋軚，話前晚召開咗特別會議，發覺紀律委員會處理投訴有失當之處，而執委會會寫檢討報告喎！工黨認為常委會同執委會未有妥善處理，需要負責。另外，執委何秀蘭身為涉事者，必須按照政治倫理負政治責任，並在特別會議上主動辭去執委及副秘書長職務。
立場變嚟變去好兒戲
之前何秀蘭乜都唔回應，尋日終於都發出聲明，不過就句句都有骨，話「我是涉事一方，被主席將會議上的批評意見展開投訴，令人遺憾。」又夾曬嘴型話，因為政治倫理，要負上政治責任，已經喺前晚辭去執委職務。佢仲話，祝留守工黨的年輕黨友茁壯成長。
鄭晴就感覺，今次工黨內訌，再一次完美示範反對派團體嘅兒戲一面，胡穗珊同何秀蘭兩個人，就可以將個工黨搞到七國咁亂，立場又可以隨便變嚟變去。誰是誰非？鄭晴唔判斷啦，市民嘅眼睛係雪亮嘅！
