圖：周浩鼎（左）、陳克勤（中）和柯創盛（右）齊齊為紅館騷練歌
網上圖片
民建聯今年25周年黨慶，嚟緊將會喺紅館開show同大家一齊慶祝，早前一張標題為「克勤就嚟又喺紅館獻唱，各位粉絲密切留意！」嘅相就喺Facebook上出現咗，不過相中練歌嘅人係民建聯立法會議員陳克勤（克勤），唔係歌星李克勤，克勤同大家開咗個玩笑喇。
除咗克勤，另一位立法會議員周浩鼎（Holden）都有上載練歌相，佢話因為今年黨慶，所以大家為咗九月嘅演出，一班議員都好努力練習，相中見到克勤、Holden同柯創盛都唱得非常認真，好有台型。
之但係佢哋到底唱咩歌需要苦練呢？鄭晴幫大家打聽過，克勤話到時民建聯嘅12個立法會議員會一齊唱兩首歌，仲會表演兩場，不過唱咩歌就暫時保密，希望到時為大家帶來驚喜。
佢又透露，到時各位議員會以一人一句獨唱嘅方式合唱，相當別開生面。見到議員們咁賣力，鄭晴相信佢哋嘅歌聲一定好聽到讓大家嘅耳朵懷孕了！
