圖：林子健尋日現身馬鞍山警署報到　　大公報記者攝

　　「鴿黨」民主黨林子健事件發生至今，好多謎團，鴿黨元老近日繼續龜縮。而之前有份陪林子健開記者會嘅林卓廷，尋日見記者時話，林子健獲准保釋後，雙方無見面，只係靠短訊聯絡，又話有黨友同律師協助林子健喎，不過林子健已經向法援署申請當值律師服務。被問到會唔會相信對方，林卓廷立即戴頭盔，話除咗已見報嘅資料外，佢未見到有關於案件嘅其他證據，所以要了解所有事實先評論。

　　鴿黨發生咁大件事，身為前主席嘅劉慧卿，日前被問到民主黨係咪有危機時，卿姐直認話：「咁當然係嘅，咁大件事發生咗。」至於閉路電視短片內嘅男子係咪林子健，卿姐就支吾以對，話而家無謂猜測，要交畀警方調查。佢又話，如果事後發現一啲何俊仁唔知嘅事，民主黨只要「坦誠」同市民解釋，相信市民會接受喎。

　　林赴警署報到 「神」回答提問

　　至於事件主角林子健，尋日傍晚6點20分左右現身，去馬鞍山警署報到。對於案情，佢一概唔答，話身體康復緊，好多嘢想講，但而家唔講得。佢之前提堂時透過代表律師話，自己將會去美國耶魯大學讀神學，又話要九月親身去註冊，但保釋條件唔准佢離開香港，咁，讀神學計劃而家有冇受影響呢？佢就懶「神」、懶玄妙咁話：「如果我係一個學術嘅材料……我諗，咪就係咁囉。」咁鴿黨有無聯絡佢呢？佢冇正面回答，只係不斷重複講：「佢哋好好喎。」嗯……