大公網8月21日訊:反對派近日開足馬力聲援因「衝擊政總」案而被判監嘅「雙學三囚」,連身在美加嘆世界嘅天主教香港教區前主教陳日君都不甘寂寞,係網誌寫文亂噏所謂「香港沉淪」,抹黑「司法已成為政治鎮壓的工具」。睇到「雙學三囚」求仁得仁,曾陪同「佔中三醜」自首但警方唔多理佢嘅陳日君,可能覺得面上無光,就話如果回港得償所願被「預約拘捕」,可以搖身一變「從探監者變成階下囚,能來陪伴獄中的兄弟姊妹,將是我的光榮」。
陳日君表面上係撐黃之鋒、周永康等人,但實際上只係唔想光環都被年輕人搶走。係違法「佔領運動」初期,陳日君就不忿運動嘅主導權落係小鬼手上,寫文批評學聯「騎劫」佔中、「行錯路」,又話「打扙無人指揮,你會贏嗎?勇字當頭是不足夠的」,呼籲學聯邀請「佔中三醜」及學者等合力組成聯盟,同政府談判,最終一班小鬼唔都睬佢。其實反對派所謂為公義而「公民抗命」,無論把口講得幾咁大義凜然,其實都係各懷鬼胎,大家有著自己嘅政治利益盤算。