圖：尋日凌晨嘅月偏食無雲遮擋，凌晨2點21分出現食甚

　　天文發燒友今個禮拜非常忙碌，尋日凌晨觀賞完月偏食，休息幾日後，禮拜六就有得睇英仙座流星雨喇。屆時每小時最多有過百粒流星劃破長空，想趁機許願？等鄭晴教你揀啱位置，咁就實無得輸。

　　尋日凌晨正天公造美，月偏食無雲遮擋，凌晨2點21分出現食甚，清晰可見月亮，下方少咗一部分。至於今個禮拜六，天文台九天天氣預測，當日大致天晴，早上局部地區有驟雨。但咁啱今年個月亮升上地線好光猛，屆時可能每個鐘只係見到10粒流星。

　　一如以往，睇流星雨當然要揀空曠而無光害嘅地方，先睇得夠清夠多。鄭晴建議，可以去西貢萬宜水庫嘅東壩或者天文公園、北潭涌、清水灣大坳門風箏場、大美督，或者石澳泳灘附近嘅大頭洲。今次唔得閒？就要等到年尾睇雙子座流雨星喇喎。

　　清水灣增兩機拍實時天氣照

　　講開清水灣，天文台網站由尋日開始，加入由兩部新增攝影機喺清水灣拍攝嘅實時天氣照片，兩部機安裝喺清水灣鄉村俱樂部，一部俯瞰大廟灣及藍塘海峽，一部遠眺果洲群島一帶水域。加嚟做乜？海事處高級海事主任黃繼河話，新提供嘅實時天氣照片，對船長評估香港東南面海域天氣狀況好有用，有助提高船隻航行安全。漁護署署理高級郊野公園護理主任黃廣潮就話，有助大家掌握東龍洲、石澳郊野公園地區最新天氣狀況，計劃戶外活動時，可以減少惡劣天氣影響喎。

　　鄭晴