大公網訊 (記者龔學鳴報道)特區政府經常強調傷健共融，究竟可以點實踐呢?今日，公務員事務局局長羅智光就去咗稅務局，搵咗一啲殘疾公務員同事傾偈，了解部門為幫助佢哋融入工作環境所提供嘅協助。患有肌肉痿縮症嘅趙得興，1982年就加入政府做助理文書主任。初時身體狀況好啲，只需要用柺杖，但年紀愈大肌肉退化得愈嚴重，要用輪椅出入。
得興之後做嘢有無遇到困難呢?原來問題唔大，得興話，工作地方嘅通道夠闊，出入有自動門，又可以用工具輔助打字，完全應付到工作要求。得興仲話，殘疾人士應該放膽投考政府工，因為政府有唔同嘅工種，相對私人市場更易搵到適合自己嘅位置，發揮所長。所以殘疾人士可以唔駛咁擔心架。
