新任勞工及福利局副局長徐英偉（Caspar）早前會見傳媒時，因為唔識答最低工資金額係幾多，引起網民熱議。正所謂「士別三日，刮目相看。」徐英偉尋日再被傳媒問到有無惡補勞福數據時，就無再「蝦碌」，唔單止即刻答到最低工資係每小時34.5元，仲講到幾種綜援金額添，果然有溫書。
Caspar話，各項勞福數字嘅背後、市民面對嘅問題同政府扮演嘅角色更重要，外界唔應該淨係睇數字。被問到同勞福局局長羅致光合作成點，Caspar話「非常愉快」，一齊研究緊點樣分工；佢又話，勞福局有好多議題要處理，過去幾日已同不同部門同事開會，接觸咗不同組織以及議員。
