圖：民建聯今年25歲，四位副秘書長尋日就同傳媒分享下自己嘅工作
今年係民建聯25歲生日，四位副秘書長尋日搞咗個傳媒茶敘，講下各自分工。鄭泳舜話，未來會多啲關注體育事業發展，亦會同外國商會、領事多溝通；黎榮浩會專注會員、義工事務，搞不同類型活動；洪錦鉉就負責聯絡智庫組織交流合作；葉傲冬就負責宣傳公關部分，做好同各界溝通工作。
唔講唔知，民建聯嘅會員就快突破三萬五千大關，為答謝會員支持、慶祝成立25周年，九月將會喺紅館開騷，曾鈺成、譚耀宗、葉國謙、陳鑑林「四大元老」合演舞台劇，民記立法會議員亦會開金口唱歌，青年民建聯會同太極樂隊成員Joey Tang夾Band演出。青民主席顏汶羽仲爆料話，想參加嘅人都要錄DEMO試音，但可能無其他成員咁好唱功，所以而家都未收到「錄取」通知。
至於會唔會派人出戰立法會補選？葉傲冬、鄭泳舜兩位好兄弟話，民建聯會繼續努力地區工作，而從善用資源角度，贊成六個議席一次過進行補選，減少浪費公帑。
