做咗六年考評局秘書長嘅唐創時(上圓圖),隨住今屆文憑試(DSE)塵埃落定,功成身退。早前佢同鄭晴透露有本地大學「招手」,當時未確定去向,尋日就確定佢重返高等教育界,「過檔」公開大學做副校長(行政及發展),將會喺9月18日履新。
將會喺9月1日「接棒」考評局秘書長嘅蘇國生,由浸會大學「過檔」。鄭晴記得,唐創時當年由浸大教務長轉職考評局秘書長,由蘇國生接任佢喺浸大嘅工作,成為教務長;而蘇國生今次「過檔」考評局,將會係佢第二度接替唐創時啦,未來嘅DSE放榜,就由蘇國生主持記者會交代成績,陪伴考生一齊放榜。