一年一度嘅香港書展尋晚圓滿結束，七日展期加上三日布展期，埋單計數，會展管理公司話，總共動用900多名全職員工、超過7000名臨時工作人員。鄭晴聽聞，單係星期日八號風球「洛克」打到嚟，為咗令書展可以喺八號波除下兩小時順利重開，就動用超過一千人幫手，無損書迷雅興，也唔好阻住參展商做生意。
其實嗰日天文台宣布取消八號風球，670間參展商要喺兩個小時後重開，一啲都唔容易！
316位保安員要將打風而收埋嘅鐵馬重新部署，疏導入場市民；322位工作人員要趕喺開場前，重新檢視清潔、照明、冷氣、扶手電梯及影音設備等所有設施運作正常；餐飲部448位廚師和前線服務員要即刻埋位準備食材，醫飽書迷個胃。
當日活動咁成功，鄭晴當然要送個「叻」畀各位幕後功臣！
