特首林鄭月娥新班子上任超過半個月，各政策局副局長人選仍未揭盅，各位等到頸都長埋。環境局局長黃錦星尋日同傳媒茶敘時自爆，經已有心水人選，會盡快對外公布。至於大家推測候任人選係咪公務員出身，佢就賣關子話，唔使收窄範圍，亦唔需要年齡歧視，副局長首要條件係「實幹」！
星星局長尋日基本上有問必答，除咗副局長人選外，佢仲大方回應兩屆政府嘅分別。佢話，前特首梁振英、現任特首林鄭月娥一樣咁「chur」（勤奮），分別唔大。不過社會對政府嘅要求愈來愈高，今屆官員需要積極回應社會嘅訴求。至於有記者反映，網民話環境局吉祥物「大嘥鬼」同星星局長有幾分相似。佢就笑住話唔多覺，反問「隻眼邊有佢咁大！」仲強調自己唔係眼闊肚窄。
眾所周知，星星局長好環保，屋企就算夏天，如果唔係熱到佢自設嘅開冷氣「門檻」，就一於唔開冷氣，大廳都無安裝冷氣機。佢邀請記者朋友下次聚餐時，人人帶埋電費單出嚟，大比拼慳電成果。鄭晴心諗，全場應該無人敢同局長你一較高低囉！
