政務司司長張建宗出名係「工作狂」，任職勞福局局長九年，從未攞過一日假，升任司長後，「工作狂」性格更猖狂。張建宗尋日同傳媒午餐時透露，而家凌晨五點半就起身，比過往做局長時，提早咗15分鐘。日理萬機，佢承諾遲下會開Facebook，希望同市民互動，但而家實在太忙，希望政助「埋班」後先開動。聽到司長對工作熱忱程度，當堂嚇得在場記者哇哇聲咁叫，話佢「鐵人」司長，真係當之無愧。
上堂惡補普通話
之不過，司長其實都有弱點，就係「普通話很普通」。佢解釋因為以前做勞福局局長時，好少用到普通話，但都深明自己呢方面有所不足，所以而家有上堂惡補。
一直畀人話係「樓王」既佢，尋日再次澄清，除咗自住物業外，其餘都係由太太持有，唔係佢「揸手」，仲好抵死咁話，「我只係有份供樓所以先申報埋，但實際上我無份㗎。」
至於幾時搬入政務司司長官邸呢？佢話呢座官邸係二級歷史建築，雖然佢決定唔裝修，但要做基本維修工程，例如換咗兩部冷氣系統，預計兩個月後先會做完工程，然後再搬入去住。咁，會唔會用官邸嘅網球場？張建宗就笑住咁話：「其實我都唔知（網球場）喺邊。」
