圖：市民可從三個角度，親歷山泥傾瀉事故 大公報記者曾敏捷攝
香港斜坡安全系統成立40周年，土力工程處舉辦專題展覽，希望加深市民對山泥傾瀉嘅認識，提高警覺。展覽非常「揼本」，除咗各種老少咸宜嘅工作坊，場內更設有虛擬實景（VR）體驗區，重現上世紀70年代嚴重山泥傾瀉事故嘅震撼場面。
展覽設有三個虛擬實境體驗區，市民可以從駕駛者、寮屋戶及直升機機師三個角度，親歷1972年兩宗嚴重山泥傾瀉事故。
如果嫌虛擬實境太刺激，市民可以嘗試自製明信片或親手喺環保袋上利用絲網印出主題圖案。同場嘅親子創意工作坊就適合家長帶小朋友一齊參加。為配合宣傳片童話主題，主辦單位設計了公主、王子、山泥魔等八款積木模型，市民除咗可以即場砌出其中一款模型帶走，仲可以親手製作卡片套作為紀念品。
土木工程拓展署總土力工程師楊暉話，極端天氣令山泥傾瀉風險增加，展覽希望提醒市民要居安思危，而由於年輕一代大部分人都無經歷過山泥傾瀉，警覺性相對較低，故展覽特別花心思希望可以吸引年輕人注意。展覽由昨日起至17日在中環元創方展出。
