大公網7月5日訊 記者龔學鳴報道：民建聯四大長老曾鈺成、譚耀宗、葉國謙、陳鑑林(橄欖)，告別立法會嘅議員生涯之後，都相對清閒。既然咁得閒，咁會有咩搞作呢?民建聯facebook今日上載短片，橄欖請咗三位長老一齊飲啖茶，吹下水。譚sir問橄欖上次有無嚟打麻雀，佢就話無，咁曾主席就立即潤佢，笑橄欖掛住搵錢唔得閒打牌，橄欖就好幽默話：「賺錢支持民建聯」，又話「呢啲叫做發展經濟、共享繁榮。」無見一排，橄欖都幾生鬼。
之後四大長老又講到一帶一路，曾主席話，自從當時嘅特首梁振英係施政報告講完之後，同年匈牙利政府立即邀請立法會議員去匈牙利做訪問，匈牙利政府就好關心一帶一路嘅事，曾主席就話好彩自己有睇施政報告。阿謙就好同意曾主席嘅講法，話舊年去莫斯科，當地後生仔真係好緊張一帶一路。咁香港後生仔呢? 橄欖就話，香港反應比較冷淡，不過可以理解，希望未來可以有個平台俾香港各界人士參與。大家講到咁高興，譚sir仲提議四大長老應該要去勻一帶一路嘅國家旅遊呢！
