圖：大家唔好再叫林鄭月娥丈夫林兆波（左）做「第一先生」喇
行政長官林鄭月娥自從成功當選後，丈夫林兆波嘅官方名銜係乜呢，一直係城中熱議話題。政府行政署近日發出嘅總務通告，就為今次熱話畫下休止符，唔係大家估過嘅「第一先生」，而係「林兆波博士」或「林博士」。
香港首次有女特首，如何稱呼特首配偶，總務通告就指出，喺正式場合、官方和法律文件，對林太嘅稱呼係「行政長官林鄭月娥女士」，唔好用「閣下」；如果致函畀林太，就要寫明「中華人民共和國香港特別行政區行政長官林鄭月娥女士」；至於正式場合，對林太應稱呼為「行政長官」或「林太」。
咁林生呢？通告話，喺正式場合、官方和法律文件，稱呼應該用「林兆波博士」或「林博士」。咁如果林生與太太同場出現，又點呢？通告話，正式場合就應用「行政長官林鄭月娥女士及她的丈夫林兆波博士」，非正式場合就用「行政長官及林博士」，但千祈千祈千祈唔好用「伉儷」，因為「伉儷」之前都會加上丈夫嘅姓氏，而行政長官地位尊貴，所以「伉儷」並唔適用。
