大公產品

首頁 > 港聞 > 正文

立會展覽 古董文獻大曬冷\鄭晴

時間:2017-07-04 03:15:16來源:大公網

  立法會由今日起舉行以「回顧與展望」為題嘅展覽,同市民分享立法會回歸20年以來嘅工作。立法會圖書館內擺放咗好多由各國議會、政府交流時送贈嘅紀念品,一入門口就有一套繡花精緻嘅哈薩克斯坦傳統法官袍,圖書館內仲有最高人民法院送贈嘅中國古代青銅器「朕匜」(貴族洗漱用具)國寶仿製品,入面刻有我國目前發現最完整嘅第一份判決書、美國眾議院送贈立法會主席嘅紀念木槌,當然仲有臨立會會議紀要同97年回歸當日第一個會議過程正式紀錄嘅真品,展品之多,不能盡錄!

  仲有估靚聲遊戲玩

  立法會主席梁君彥(右)同秘書長陳維安(左)開心晒冷 大公報記者麥潤田攝

  展覽亦準備咗唔少互動展品,向參觀者介紹立法會歷史,仲幾好玩添,好似介紹歷任議員嘅電子展板,亦有畀參觀者聽聲估嚇係邊一位議員發言嘅遊戲。

  大堂上仲有一棵「花樹」藝術裝置,代表立法會聆聽市民意見。參觀者可以由15個品德中,揀出一個最希望立法會做到嘅,掛喺「花樹」上面。梁君彥同鄭晴講,自己身為主席,揀咗盡忠職守畀自己,至於揀咩畀各位議員?佢話:「如果議員做曬15樣,滿分就最好喇。」

  今次展覽喺立法會綜合大樓地下大堂及圖書館展出,展期去到7月31日,有興趣嘅朋友可以去立法會登記,或者參加立法會教育導賞團㗎!

最新要聞

最新要聞

最受歡迎