香港號稱美食之都，國家主席習近平尋晚出席特區政府嘅歡迎晚宴，大家係咪好好奇佢食咩餸呢？鄭晴八到歡迎晚宴嘅菜單，仲知道晚宴筵開38席。原來晚宴食中菜，連前菜、甜品共十道菜，未見鮑魚或魚翅等昂貴菜式，菜式比較簡單，迎賓大拼盤包括五香滷水牛、香芒明蝦卷、涼拌青筍、美味羊羔；主菜有香酥鮮蟹蓋、淮山杞子響螺燉豬腱、碧綠蝦籽大烏參、古法清蒸海上鮮；主食有翡翠北菇素荷包、竹籠瑤柱雞粒荷葉飯；最後有甜品椰汁紫米露、甜點心同鮮水果。晚宴菜單真係聽落都流口水，難怪民建聯阿Ben（陳恒鑌）直播晚宴情況時話，今晚「幾好餸」。
唔講你可能唔知，歡迎宴嘅菜單，同特首梁振英前晚宴請主席嘅家宴，菜式有唔同㗎，當日有蝦球、雞湯、炸子雞、時蔬，雖然都有魚和荷葉飯，但煮法就唔同。
