圖：本地業界希望政府投放資源支持發展
電子競技（電競）產業正響全球迅速發展，香港亦嘗試「追落後」。旅遊發展局將於八月首辦「香港電競音樂節」，除咗邀請前世界級選手來港較勁，亦邀請多隊韓國人氣組合表演。不過，一向鍾意打機嘅新民黨立法會議員容海恩（Eunice）就話，「香港電競音樂節」只係為本港推動「電競」產業行出一小步，政府長遠需要加強支援同推動本地遊戲產業鏈發展。
尋日，Eunice同多位本地遊戲產業嘅業界人士舉行記者會。Eunice話，唔少人提起「電競」，都只會諗到年輕人打機做運動員，但其實要發展電競，先要發展遊戲。佢希望政府能夠從源頭入手，多啲關注本地遊戲開發商嘅經營問題，咁先可以令電競產業蓬勃發展。
香港遊戲產業協會主席施仁毅就認為，「香港電競音樂節」只係利用「電競」一詞嚟包裝一個由韓星做主角嘅演唱會，對本地遊戲業界「冇乜幫助」，希望政府能夠真正投放資源支持業界發展。香港遊戲創作協會召集人朱罡霆就期望，香港長遠能夠發展「電競業園區」，除咗可以聚集業界人士，亦能夠提供大型比賽場地舉辦國際賽。
