大公網6月11日訊 記者冼國強報道：做人最緊要正直嘅熱血公民主席鄭松泰，今次就真係踢爆佢真面目啦!知名網民仇思達尋晚係facebook舉行直播，播出一段疑似鄭松泰嘅錄音，講到同梁頌恆、游蕙禎種種因怨。鄭松泰就話，「響九月至到去一、二月，梁頌恆、游蕙禎呢啲……呢啲佢哋應該死啦!」但問題要係公眾場合扮friend，畀其他人知道熱狗幫緊佢哋，「因為大眾白痴呀嘛!佢哋以為我哋係本土派嚟架嘛，你明唔明呀?本土派同一陣營嚟架嘛」。

　　把聲擺到明係鄭松泰，佢只有焗認，係facebook發帖話「我在熱血公民工作組所發表的工作匯報和內部溝通被人流出了。對於有手足沒有遵守黨規和破壞內部溝通指引，本人深表遺憾。」之後仲要為自己「白痴論」係度兜，話「9月4日當日有份支持梁游而令教主黃毓民敗選的人，全部都是智力有問題。」

　　大批網民好似如夢初醒，話鄭松泰兩面三刀。網民Roy Choi話：「熱血公民正白旗旗主鄭松泰完全抹殺言論自由，人地拎足證據指責你，唔回應不特只，仲要又Del又Block。」另一網民鄧錦愛話：「汪洋大盜黃洋達、鄭蟲泰幾時將呃人嘅牧狗仔隊D錢退還給大家呀?」網民謝嘉樂就話：「出選時熱普城從無講過選得一個議席既話會全面退出社運。宜家鄭議員取得議席而疑似『改變用途』，想問下佢可以向投咗票既選民交代嗎?」老師又中，老師又中……箭呀!