民建聯張國鈞（Horace）鍾意健身鍾意到出曬名，唔止咁，佢仲係超級足球迷，好似之前英超熱刺對傑志嘅賽事，佢都有去捧場！嚟緊英超又有四支球隊嚟香港踢亞洲杯，身為香港足球總會上訴委員會嘅佢，成功認購兩日球賽各12張飛。之不過，因為佢好多朋友問佢攞飛，佢又唔想say no，結果唔小心派曬，連自己都無得睇！
同南華元老過招輸六比一
無得睇波，講下踢波止下癮都好！Horace廿幾歲嗰陣已經同朋友組咗隊足球隊，每年都會同南華元老隊過招，最近先踢完嚟。Horace話嗰日比賽畀對手「大數」六比一，但咁唔代表佢哋「屎波」，皆因對方陣容超勁，有唔少昔日球壇風雲人物，佢志在同明星踢下波，贏輸都無咩所謂！
Horace仲同鄭晴講起綠茵場上嘅威水史，佢話有次成功喺前港隊腳下搶到波，但係場地唔靚，接近埋門個波着地時彈開咗，可惜！
