圖：夏水禮玩懷舊風，請嚟小黃鴨LT Duck坐鎮
熱辣辣嘅暑假又嚟啦，又到玩水好季節！海洋公園下個月開始每年一度嘅夏水禮，今年大玩懷舊風，請嚟本地經典品牌小黃鴨LT Duck坐鎮，同大家玩濕身。鄭晴相信小黃鴨承載咗唔少香港人難忘嘅童年回憶，今次公園將會有數千隻可愛小黃鴨「游進」園內，歡度陽光假期，相信一定會有超級多人入場瘋狂自拍。除咗可愛小黃鴨，為呼應海洋公園慶祝開業40周年，園方專登邀請世界著名雕刻大師Ray Villafane喺怡慶坊內創作全港最大型沙雕，大家真係唔好錯過喇。
