圖：政府推出咗本60頁小冊子，講兩地嘅合作項目，內容一啲都唔「小」

　　香港就嚟回歸祖國20年喇，鄭晴尋日上政府一站通閒逛，發現政府靜靜咁推出咗《本屆政府與內地合作的進展》小冊子，細數呢幾年香港同內地合作嘅故事。不過呢本「小冊子」實情一啲都唔「小」，一共有60頁，囊括11個範疇，包括金融、基建、文化、環境保護等等，唔睇唔知，原來呢幾年香港同內地展開咗咁多合作項目，兩地緊密融合真係唔係講講下。

　　其中喺「開拓發展空間」章節入面，就講到香港點樣配合「一帶一路」發展嘅成果，好似2016年香港舉行首屆「一帶一路」高峰論壇、政府成立「一帶一路」辦公室、特首率領香港特區代表團參加嘅「一帶一路」國際合作高峰論壇等等。仲有「推進跨境基建」章節入面，更重點提及各項跨境基建進展，例如準備開通嘅廣深港高速鐵路香港段，同港珠澳大橋工程、蓮塘口岸工程等。

　　梁振英喺小冊子撰文話，香港享有「一國」之利，「兩制」之便，要秉持「國家所需、香港所長」宗旨，發揮獨特優勢，為國家貢獻力量。佢期盼香港可以抓緊國家發展戰略新機遇，喺「一國兩制」原則下發揮獨特優勢，繼續鞏固和提升在國家經濟發展和對外開放中嘅地位與功能，繼續發揮「超級聯繫人」角色。

　　呢啲政策雖然成日聽，但原來數數埋埋可以有成60頁咁多，有興趣嘅市民可以上政制及內地事務局網頁（www.cmab.gov.hk/doc/tc/documents/publications_and_press_releases/Booklet_on_Mainland_Co-operation.pdf）睇下，話唔定會發現你有份受惠嘅政策添！