圖：梁繼昌點都唔肯辭去UGL專責委員會委員

　　梁繼昌以惡搞特首梁振英為己任，即使佢有多重身份、角色衝突，都唔肯辭去UGL專責委員會委員。出位成咁，近日佢成為香港「網紅」，唔知係咪「人紅」心情靚，兩個月前佢用咗八十六萬二千七百多元，買入咗今年出廠黑色寶馬5系Saloon M Sport Edition特別版，連埋首次登記稅四十四萬幾，梁議員大手筆用一百三十多萬買架靚車，唔止威威，仲可能睇中架車一項特別功能！

　　夫妻關係曾亮紅燈

　　呢架寶馬擁有全新3000cc TwinPower Turbo，馬力強勁，架車開行馬力，傳媒想追訪佢都幾難。話時話，梁議員要咁快，唔通佢再爆「婚外情」，要避避鏡頭？

　　話說舊年有份周刊就踢爆梁繼昌同佢聘任議助搭上，二人頻頻見面，「過從甚密」，互傳「我掛住你」、「我的心很痛」等肉麻信息，最慘呢段「曖昧交往」，唔單止令梁繼昌同太太吳敏珊嘅二十幾年夫妻關係亮起紅燈，仲刺傷當時身為女議助男友嘅心，最後結束戀情。

　　睇番梁繼昌同太太於1998年以一千二百一十萬買入白建時道嘉雲臺嘅單位，梁繼昌佔七成業權，太太吳敏珊佔三成業權，梁氏夫婦間屋「七三分帳」，經歷疑似婚外情，至今業權「七三」關係仍然維持不變，算係「情比金堅」。所以呢，聽講梁繼昌架新款黑色寶馬，接載都係老婆同一對仔女。