圖：「空中之旅」邀請咗來自基層家庭的小朋友同家人一起「衝上雲霄」

　　國泰航空連續第七次舉辦「空中之旅」，邀請咗100名來自基層家庭嘅小朋友，乘坐波音777飛機，同家人一起「衝上雲霄」。今次嘅飛行時間約兩個鐘，喺空中沿「心形」軌跡飛行，以表達「同心協力，自強不息」嘅主題。財政司司長陳茂波（Paul）同國泰航空行政總裁何杲都陪同上機，喺飛行期間同參加者傾偈、合照，又派禮物。

　　受到小朋友歡迎兼拎簽名嘅阿Paul用自己嘅經歷勉勵佢哋。原來佢都係出生自基層家庭，第一次搭飛機係大學畢業，「嗰時自己好興奮，影咗好多靚相」，亦都希望所有小朋友會好似佢咁開心。Paul又讚揚呢次「空中之旅」好似特區政府嘅慶祝主題「同心創前路．掌握新機遇」咁，鼓勵啲小朋友無畏困難，自強不息，勇於挑戰。

　　盼勇敢面對困難

　　今次「空中之旅」特別航班，揸機嘅係舊年駕駛本地裝嵌飛機「香港起飛」，跟住完成環球之旅嘅機師鄭楚衡（Hank）。飛機一路向南，並在中國南海上空盤旋，飛機飛過嘅航道喺天空中形成一個愛心。Hank話呢次體驗幾特別，「非筆墨可以形容」，而之所以設計「心形路線」，係希望參加嘅小朋友可以勇敢面對困難，勇於追夢。

　　有得搭飛機，小朋友梗係開心啦。今年八歲半嘅瑩瑩第一次搭，仲同嫲嫲、姑姐一起，心情「有少少興奮，又有緊張」，瑩瑩話尋（前）晚食晚餐時就諗，「終於可以搭飛機喇」，之後好早就上床瞓覺，為咗今（昨）日可以「有精神」。飛機起飛時，瑩瑩驚啲雲太多，機師睇唔清路，又驚飛機會上下搖晃，只好捉住姑姐隻手。「之後想去日本睇櫻花、Shopping」，瑩瑩話。

　　收財爺簽名好開心

　　13歲嘅燁婷三年前同爸爸媽媽移民香港，初初因為英文較差搞到成績一落千丈。之後喺老師嘅幫助下，進步明顯，又考入精英班。佢仲攞到阿Paul嘅簽名，話好開心之餘亦希望自己嘅經歷可以鼓勵其他小朋友，又話將來想成為一個編劇，將唔同人嘅生活經歷、性格夾埋一齊，寫出香港嘅「酸甜苦辣」。