圖：一眾名廚急不及待露兩手，而周中（右三）師傅呢……暫時「收埋」兩手

　　食神歸位！哈哈哈，正所謂「文無第一、武無第二」，揸刀揸鑊鏟嘅廚師，當然都想稱霸「廚房」。40個國家及地區、超過300名嘅粵菜名廚，將會喺9月5日至7日雲集香港，一較廚技，爭奪「粵菜廚皇」寶座。粵菜文化博大精深，識食，一定等呢班大廚獻技時食呢餐！

　　周中師傅蠢蠢欲動

　　世界粵菜廚皇協會兩年前喺廣州首辦「世界粵菜廚皇大賽」，超過32個國家及地區代表參與，爭逐「廚神」。今年第二屆比賽當然更大規模，鄭晴聽今屆賽事組委會主席楊位醒（醒哥）講，賽事將會公開報名，搵40位本地名廚參賽，部分大廚仲曾經拎過「米芝蓮」認證，聽講連阿周中師傅都有興趣露兩手咁話。至於「過江龍」都唔嘢少，台灣、新加坡當地嘅名廚，煮粵菜都有一手，仲有歐盟廿七國、英國、美國，甚至中東、非洲選手，都絕非等閒之輩。

　　正所謂「食在廣州、味在香港」！香港係美食之都、粵菜嘅承傳之地，港人當然有責任將粵菜發揚光大。醒哥講，已經向聯合國申請，將粵菜列入人類非物質文化遺產，仲希望透過賽事，令粵菜文化傳遍至世界各地。

　　鄭晴其實連「黯然銷魂飯」都煮得出，仲對粵菜都好有研究，想問嚇醒哥今屆仲請唔請評審，畀個機會我試盡各大廚佳餚呢？