圖：Ann姐尋日就喺個人facebook度發文，話畀成班「老友記」知，北上深圳、廣州有啲咩優惠
香港「老友記」憑長者卡搭車可享兩蚊優惠，但原來仲未夠筍，香港長者憑一張「回鄉卡」去內地玩樂和乘坐交通工具，優惠分分鐘更加勁！民建聯立法會議員蔣麗芸（Ann）尋日就喺個人Facebook專頁度發文，話畀成班「老友記」知，北上深圳、廣州係可以免費乘坐公共巴士同地鐵嘅，去廣州仲可以免費坐渡輪過江添。
70歲以上五樂園免入場費
阿Ann話，喺廣州，60歲或以上長者可享半價優惠，入去文化館、紀念館、博物館，同埋半價睇戲，連睇醫生都可以慳番門診掛號費。講到深圳就仲着數，60或以上女性同65歲以上男性，唔止可以免費進入市內任何公園、旅遊景區、博物館、美術館等文化場所，仲可以去公共體育場所book場打波，完全唔收錢！如果你係70歲以上，「世界之窗」、「歡樂谷」等五個著名主題樂園仲免費入場。嘩嘩嘩，優惠隨時多過香港！
不過阿Ann又溫馨提示，只要各位「老友記」去邊都要帶住「回鄉卡」，去玩、坐車嘅時候，出示畀職員睇就得，隨時唔使錢就可以深穗玩足一日。咁睇起嚟，內地針對老人嘅優惠比香港做得更全面，實在值得學下。
