何啟明(右二)話以後要多啲同大家一齊出嚟「溜娃」。
大公網4月17日訊 早幾日除咗係復活節假期，原來仲係教育局政治助理施俊輝囡囡 Shereen一歲生日嘅大日子。佢地當日搞咗一個相當盛大嘅生日party，仲搵咗唔少同佢地一樣初為人父母嘅朋友同小朋友一齊慶祝，工聯會立法會議員何啟明、自由黨區議員李梓敬、新民黨區議員陳家珮同佢地嘅B仔都係座上客。
壽星女Shereen當日眼仔碌碌，作為party主角嘅佢著住淡粉紅色嘅公主裙仔，頭上一條小辮仔，造型有少少似一齣動畫嘅角色「阿美」，相當可愛。為咗賀佢生日，Shereen有一個巨型嘅花園造型生日蛋糕，蛋糕主面有花花草草，仲有間屋仔，唔通係希望Shereen第日有得住連花園獨立屋?
生日party之後，施俊輝同何啟明分別喺網上分享party嘅盛況，何啟明仲話以後要多啲同大家一齊出嚟「溜娃」，又話要搵埋李梓敬同陳家珮一齊出嚟。鄭晴諗起咁多得意嘅BB濟濟一堂都覺得好期待，唔知下次輪到邊個B生日呢？
