香港係「UFO之都」？原來天文台由2012年至2016年，短短四年間一共接獲102宗市民目擊不明飛行物體（UFO）報告，其中來自元朗區的報告，高達十宗，稱霸十八區！
立法會文件顯示，香港真係有可能出現過UFO，天文台連續多年都有收到報告，傍晚六時正至7時59分，更係UFO出沒高峰期，該段時間市民目擊UFO報告最多，共有十九宗。以地區嚟睇，元朗接獲十宗報告，單係2012年已經有五宗；其次喺沙田有八宗；東區都接到六宗，位列第三。
有網民就唔多信，話「嚇鬼咩！航拍嚟㗎！」但事實係點，就不得而知！查實本港不時有都市傳說話見到UFO，舊年有網民喺facebook貼文，喺荔景賢麗苑影到青衣南上空出現UFO，相片出現一隻飛碟狀發光體，貼文者指「長曝八秒，發現影到疑似UFO」，不過20分鐘後，「同一地點曝光10秒連影多張，已消失無蹤。」
至於香港歷史上最著名一次集體目擊UFO，就要時光倒流去到1978年，據聞當年中秋節前後，有一架金銀色閃光的巨型UFO，喺華富邨上空低飛掠過，而且更加有強勁氣流同巨響，最後架UFO飛向海邊消失。不過事後有人話，架疑似UFO只不過係氫氣球，而氣流、巨響就係戰機低飛造成。
