圖：阿姐大讚許曉暉（右圖）有能力、態度友善、容易溝通
候任行政長官林鄭月娥日前話，希望下屆政府班子至少有三名女性做問責官員，全國政協委員、文化界選委汪明荃（阿姐）就透露，自己睇好民政事務局副局長許曉暉。
阿姐尋日出席電台節目嗰陣大讚許曉暉有能力、態度友善、容易溝通，係唔錯嘅官員。
佢又話民政事務局管理範疇太多，建議下屆政府另組文化局嚟處理文化政策。
被問到希望西九興建一個大型表演中心抑或故宮文化博物館，汪阿姐毫不猶豫咁選擇咗後者，理由係香港已有一定嘅表演場地，而「博物館就係缺乏嘅」。
佢進一步解釋話，香港一直標榜為國際文化都會，但就無一個文化嘅博物館，認為反對興建博物館嘅人係「唔了解博物館對香港嘅重要性」。
