立法會宣誓時公然播「獨」嘅「青年新政」游蕙禎又再有新搞作，近日網上流傳一張游同友人嘅合照，相中佢仲着住黃白色緊身旗袍，當正自己係Model咁擺曬姿勢，不過好多網民就唔多受落，仲有人大鬧游又話要「港獨」、脫離中國文化，但着旗袍好自相矛盾。而曾參與立法會新界東選舉嘅陳雲，前晚喺個人Facebook上載咗嗰張相，仲喺文中譏笑對方係為咗酬謝支持者而影，又話「他們（青年新政）會在補選再來。現在，他們開始選戰的文化品味宣傳了」，又指支持青政嘅後生仔女會好受呢套，「因為他們就是游小姐同一類貨色」。
游蕙禎尋日就喺Facebook撰文同陳雲隔空罵戰，係hashtag（標籤功能）寫上「＃補選工程」、「＃一定係咁」回應，又繼續上傳自己着旗袍嘅相，聲稱要「珍視自身所傳承的文化，切勿妄自菲薄」。
講到底，陳雲和游蕙禎咁樣針鋒相對，都係想喺補選中分杯羹啫。
不過，鄭晴覺得，佢哋都唔使鬥啦，因為呢班人都係口口聲聲要「港獨」，邊有資格再參加補選呢？
