尋日清晨氣溫得14℃，但行政長官選舉會場內嘅氣氛就十分火熱。早上7點47分，特首候選人林鄭月娥同大仔林節思、競選辦團隊「一馬當先」，出現喺灣仔會展新翼三樓嘅投票站外面，同準備進場投票嘅選委握手。選舉投票九點先開始，民建聯會務顧問譚耀宗（譚sir）就一早嚟到霸定頭位，鄭晴問過譚sir，做咩咁早嚟投票，譚sir笑笑口話，自己心情激動到瞓唔着，所以早咗起身。港區全國人大代表副召集人盧瑞安亦都好早到，排喺譚sir後面。
多名地產大亨亦有現身投票，恆基主席「四叔」李兆基同兒子李家傑、李家誠一齊到場，「四叔」大讚林鄭係「眾望所歸」，嘉華國際呂志和亦讚林鄭「實事求是」，信和主席黃志祥更陪同林鄭一齊拉票。長和主席李嘉誠到場時，逐一同林鄭月娥等三名候選人握手致意。
唔少選委都同鄭晴講，今次投票效率快咗好多，上屆排幾十分鐘人龍，今次十分鐘就搞掂。原來，選管會今次簡化咗登記程序，唔使好似以前咁要檢查身份證，只要選委佩戴好內附電子認證嘅選委牌，入場後就快速分流，真係簡便快捷。
