圖：Michael（右）解釋見到架心儀二手車65折賣畀佢，當然買咗先啦
唔少立法會議員都會自己揸車或者請司機揸車代步，工聯會陸頌雄（Michael）個幾月前都買咗架車，但係原來佢而家仲未學滿師考牌，有車揸不得。
點解會未學好車就先買車呢？Michael解釋，佢之前睇中咗一架美國牌子嘅五門掀背車，不過因為呢架車喺香港比較冷門，就算二手市場都唔多，所以當佢見到有一架落地只係半年嘅二手車，仲要傾到65折賣畀佢，就立即買咗先喇！
Michael仲講笑話，發覺好多年輕人一過18歲就考車牌，所以當佢同太太去考筆試時，已經係試場內嘅「Uncle、Auntie」！鄭晴就覺得學無前後，達者為先，Michael下星期就開始落場真係出路面學揸車喇，佢仲「目標為本」特登揀咗自動波，希望六月考牌能夠「一Take Pass」，盡快有得揸車！至於到時同太太一齊考到車牌後，同時要用車點算，Michael就大賣口乖，「一定係老婆優先」，最好由佢做司機車埋老婆添啊！
