容海恩笑言，現時忙到連開年飯都未食。
大公網2月2日訊（記者龔學鳴）新民黨容海恩(Eunice)既係立法會議員，又係大律師，兩樣嘅工作量都相當驚人，近排仲要幫忙主席葉劉淑儀競逐特首，到底佢忙到咩程度呢？今日Eunice同傳媒茶敘嗰陣，就話由立法會選舉一直忙到而家，新年又會落區，都無咩時間陪伴屋企人，連開年飯都未同屋企人食呢！朋友都好少見到，而自己公司都返得好少，一個月只係返兩次，而一個月只係上庭一、兩次。被問到忙到幾時，Eunice笑笑口就話，而家到三月都唔可以放假啦，唔通突然話去日本咩！
新年就會睇戲，估唔到Eunice都鍾意睇戲，仲好鬼鍾意睇恐怖片添！入門級數嘅《人形蜈蚣》一至三集都睇過呢！如果另一半都睇恐怖片，咁就最好喎！點解鍾意睇恐怖片呢?Eunice就話，鍾意嘅嘢無得解，又話睇戲都係尋找刺激。估唔到男仔頭嘅Eunice，口味都幾獨特喎！
