大公網1月26日訊（記者龔學鳴）就嚟過新年，當然少不了大魚大肉，有乜嘢辦法可以安全過完年而唔會體重激增？保險界立法會議員陳健波（波哥）尋日就係Facebook上載一條短片，搵嚟食物及衛生局局長高永文，教大家飲茶消滯。
高醫生話，茶嘅分類根據發酵嘅程度，而家主流分為黑茶、紅茶、青茶、黃茶、白茶、綠茶六種，發酵程度依次由高至低。如果食咗太多肥膩食物，飲普洱等偏深色嘅茶就有消滯作用啦。不過，高醫生都溫馨提示，唔喺飲咩茶都合適，綠茶無經過發酵，屬性偏寒涼，如果個胃唔舒服個陣，就不適宜飲用。呢個亦都係好多人年紀愈大，就會慢慢偏向飲發酵茶嘅原因。
高醫生係短片中仲向大家提前拜年，用家鄉嘅潮州話祝大家「新年如意，身體健康！」坐係隔離嘅波哥其實都係潮州人，但就無得有樣學樣，因為佢透露，自己識聽唔識講喔。睇嚟真係要同高醫生好好學返幾句家鄉話啦。
