大公網1月11日訊 （記者許嘉信）本港冬季係流感高峰期，衛生防護中心今日派人到立法會綜合大樓，幫立法會議員注射流感疫苗，總共有21名議員排隊打針，唔少人都話負責打針嘅護士手勢好。其中，經民聯林健鋒笑言「佢打咗（針）我都唔知」，新民黨田北辰就話，今年由護士出手，冇食物及衛生局局長高永文舊年打針咁痛。
高局長雖然冇現身，但食衛局副局長陳肇始就有到場，睇住議員接種疫苗，其間仲會同佢地傾嚇計、拍嚇佢哋膊頭，睇嚟係想幫議員分散嚇注意力。
民建聯陳恒鑌（Ben）就打咗自己人生第二支流感疫苗。佢話，依家流感惡菌好犀利，而自己屋企「有大有細」，希望透過接種疫苗嚟增強自身防禦力，仲話遲啲會帶埋屋企人打針添。
阿Ben又話，好多市民都唔鍾意打針，認為就算患感冒，都會好快好，駛乜打針，但其實長期病患者係有需要接種疫苗嚟預防流感。佢希望透過自己以身作則，能夠說服街坊一齊打針。
